للمرأة العاملة ... 5 نصائح للموازنة بين العمل والمنزل

لأن البيت والشغل بيشغلوا تركيز النساء العاملات بشكل كبير، ودايمًا عندك الخوف من انك تكوني مقصرة في بيتك لحساب شغلك أو العكس. لو عايزة تعرفي إزاي تحقق التوازن بين بيتك وشغلك يبقى المقال ده ليك، في 5 نصايح لو نجحتي في تنفيذهم هتقدري تدي بيتك وشغلك حقهم.

الإحساس بالذنب لا يُفيد:

إحساسك بالذنب مش هيفيد أي طرف من الأطراف وأولهم انتِ؛ علشان كدة حاولي تتخلصي من الشعور ده، ولازم تعرفي انك مش أول ولا آخر واحدة قررت تشتغل وعرفت تحافظ على بيتها وشغلها في نفس الوقت. لأزم تقدري قيمتك في مكان شغلك وتحسي بأهمية اللي بتعمليه.

تنظيم الوقت هو السر:

تنظيم وقتك سواء في البيت أو الشغل هو سر انك تعرفي تحافظي عليهم. في البيت لازم تكون أولويتك هي بيتك وأولادك، وعلى العكس في الشغل لازم يكون عندك جدول زمني محدد علشان تقدري تخلصي كل المطلوب منك في وقت الشغل  ومتضطريش تقعدي وقت إضافي؛ لأن بالرغم من العائد المادي اللي ممكن تحصلي عليه لكن الوقت الإضافي ده من حق أولادك. من أهم النصائح اللي هتساعدك تنظمي وقتك هو ان مكان الشغل يكون قريب من بيتك؛ علشان توفري وقتك ومجهودك اللي ممكن يضيع في الزحمة، وخليكِ دايمًا فاكرة ان أولادك أحق بأي وقت ممكن يضيع.

الحياة الزوجية مشاركة بين طرفين:

لازم تعرفي ان البيت مش مسؤوليتك لوحدك، ولازم جوزك يشترك معاك في الاهتمام بالأولاد. ممكن تتشاركوا الواجبات اليومية، زي مثلًا تحضير شنط ووجبات الأطفال، ممكن تحضروها سوا من الليلة اللي قبلها. ممكن يكون جوزك يكون مسؤول عن توصيل الأولاد، على حسب مواعيد الشغل.

الأنشطة الأسرية:

متنسيش تنظمي أنشطة أسرية تتجمعوا عليها كلكم. حاولي قدر الإمكان يكون أفراد البيت كلهم متواجدين على الوجبات الأساسية زي الفطار والعشاء. وبعد وجبة العشاء يُفضل تخصيص وقت لأي نشاط عائلي تتواصلوا فيه مع بعض، سواء لو قررتوا تلعبوا لعبة، أو تتفرجوا على فيلم، أو تناقشوا أحداث يومكم.

اهتمي بنفسك:

متنسيش وانت بتهتمي بشغلك واللي حواليكي تهتمي بنفسك. وانت بتنظمي وقت لازم تحددي وقت لنفسك في الأسبوع تهتمي بيه بنفسك، سواء على المستوى الجسدي أو النفسي. ممكن تحددي وقت تمارسي فيه رياضة؛ علشان تحافظي على جسمك، أو تروحي سبا على الأقل مرة في الشهر؛ علشان تفصلي من الضغط وتجددي نشاطك.

 انك توازني بين بيتك وشغلك مش حاجة مستحيلة، ولازم تعرفي ان وظيفتك الأهم هو كونك أم، لكن ده ميمنعش انك تقدري تقومي بالدورين على أكمل وجه، كل اللي انت محتاجاه تنفذي الـ 5 نصائح اللي وضحتهم لك.