ليه النادي الرياضي مهم بالنسبة لأولادك

أثر النوادي الثقافية والرياضية في تنمية قدرات الشباب كبير علشان الأندية الرياضية بتغرس مبادئ عظيمة في نفوس الشباب، وبتكرس جهود كبيرة للتأكيد على الأخلاقيات والواجبات اللي مفروض تبقي موجودة عند كل مواطن وشاب في المجتمع. الأندية الرياضية بتقدم رعاية للشباب وبتحتويهم وبتشغل أوقات فراغهم. الأندية بتقدم برامج وأنشطة مختلفة منظمة بتحصن أفكار الشباب من الانحرافات الفكرية، وبتسعى دايمًا انها تبعد الشباب عن الغزو الفكري المنتشر في الفترة الأخيرة. 

أهمية النادي الرياضي للأطفال

النادى هو بيت الطفل التاني، وممارسة الرياضة بتكوّن شخصيته وبتنمي مبادئه الأخلاقية، لأنها بتركز تفكير الطفل في تطوير نفسه في لعبته.

الطفل الرياضي بيكون قدوة لكل أصحابه وزمايله وده بيخلق عنده نوع من أنواع النشوة والفخر بتعبه ومجهوده و نتايجه اللى بيشوفها منها، وبيبقى ملهم لكل حد فى سنه. بالإضافة لأنه من خلال تمرينه مع اللى فى سنه ممكن يكوّن صداقات وصحبة صالحة ممكن تستمر مدى الحياة.

النادي والتمرين هو مكان مفيهوش أى نوع من أنواع التمييز من حيث الديانة، أو الثقافة، أو اللون. الرياضة بتعلم الطفل إزاى يقسم وقته ويستفيد منه بأقصى درجة في شيء مفيد. الرياضة بتعلّمه إزاى يتحمل المسؤولية، ولما يقع أو يخسر إزاى يعزز نفسه نفسيًا و يقوم تانى.

الرياضة بتطلع كل الطاقة السلبية المدفونة اللى كانت ممكن تتحول لتصرفات سيئة فى أماكن تانية.

مقترحات للأنشطة الرياضية

من الألعاب اللي بتنمي الذكاء وبتعلي اللياقة البدنية جدًا، وكلها روح تنافسية عالية هي السباحة وكرة القدم، والألعاب القتالية، وكرة السلة، وكرة اليد. ألعاب اللياقة البدنية هي ألعاب ليها جمهور فى أنحاء العالم وده هيشجع الطفل انه يشارك فى بطولاتها ويحقق فيها إنجازات منذ الصغر. وبردو مهم ان الطفل هو اللى يختار اللعبة اللى تناسبه وميتعرض للإجبار من أي حد على لعبة هو مش حاببها أو مش عايزها من أهله علشان بدل ما يروح التمرين والنادى علشان كل السمات الكويسة اللى ممكن يكتسبها منه، هيتقلب الموضوع رأسًا على عقب وهيحس انه بيعمل حاجة مجبور عليها و عبء كبير تاعبه نفسيًا و جسديًا.

موقع النادى الرياضى

زى ما اختيار الألعاب مهم، بردو اختيار النادى مهم. علشان هو هيقضي فى النادي أغلب وقته، فلازم نتطمن ونختار نادي يبقى في نفس المستوى اللي هو متعود عليه، وميتعرضش فيه لأي نوع من أنواع الأذى الفكري أو الاجتماعي. اختارله مكان يبقى شبهك ويكمل رسالتك معاه. ده غير ان مهم جدًا النادي يبقى قريب من البيت توفيرًا لوقته ومجهوده، كفاية مشواره للمدرسة كل يوم أو للدروس. ليه متفكرش مثلا تسكن فى مكان يبقى جنبك النادي والمدرسة وكل اللي هتحتاجه؟ الوقت اللى بيضيع كل يوم فى الطرق ممكن يتوظف فى عمل أشياء مفيدة تانية. ريّح أولادك من المجهود المبذول من غير داعي و قربلهم كل حاجة جنب البيت. 

فى النهاية، الرياضة شيء أساسي في حياتنا وبتحسن من إنتاجية الأطفال وبتعزز مهارات عقلية مهمة وده بينعكس على باقي جوانب حياتهم. سهلها على أولادك واختار موقع النادي فى مكان يقدملهم الخدمات اللي تليق بيهم.